1Ti 4 | WSK | STEP | Korang Bur wetang te nanga manarso, tom nukum te kariimet saki den nunguning nubiring tumon, ale bur memek nongote ikia kawel tamon ale karo tumonko.

1 Timothy 4

Tom nukum te kausa kariimet aratomon den kawel duap duap balmonko

1 Korang Bur wetang te nanga manarso, tom nukum te kariimet saki den nunguning nubiring tumon, ale bur memek nongote ikia kawel tamon ale karo tumonko. ^{▼▼1 Tim 4:1 Nuna ikia kawel suen biya balmonko: 2 Tim 3:1; 2 Peter 3:3; 1 John 2:18; Jude 18.} 2 Kawel kariimet imitang nunga ikia aora biya, se nongota nunga memek ko nongomang bataga bo mena, se nuna ikia kawel mu tamon ale saki alo te nunga kulurmonko.

3 Ale balmon, “Ninimi me gialko,” mamon, aking “inang sumu me nalko,” mamonko. Bare Kaem na beteram mu arikaya nu ko nongomang ningi nunguning aram, ale noko den nunguning ko ikiman, mu nuna nu amilmil tui se na mu namonko ko beteram. 4 Mel suen biya Kaem beteram mu am ningo la. Bo ari menakko mena, bare suen la ginak ale Kaem amilmil tunakko. ^{▼▼1 Tim 4:3-4 Na mel suen la ningo: Gen 1:29,31; 9:3; Mark 7:19; Acts 10:15. Nuwus-kuari bagara mu mel ningo: Gen 2:24; 1 Cor 7:28; Heb 13:4.} 5 Mu awuk, Kaem ko den te, se ngatangara te, mel umu noko koma te laili aman.

Timothy Kristus ko ura kari yawara bagurukko Paul maonam

6 Ni den imi te Kris alo nunga sinar awur mu ni Jesus Kristus ko ura kari nunguning. Mu te ni keta nimi wetang te bitarko, ni keta den nunguning te nimi sokel tuikasam, ale pempem la yawarakala karo tuikasam. 7 Bare ikia kawel se dugu duap kawel kariimet saki balsan mu biring tuiko. Ale Kaem koma te diram bagerko ko sail tagirko. 8 Mu awuk, kolara te aratanakko nangimik guang sail tusan mu ko ikia ningo, bare mu tom tukunangta ko la nanga sangarso. Bare Kaem koma te diram baganakko ko sail tagisan mu mel gira nunguningkiri. Mu tom imi ko la me nanga sangarso. Mena. Tom udagi ko betela nanga sangarso.

9 Den balem imi mu den nunguning, ni iki ale am ko gemang ningi nunguning arukko. 10 Umutang ko ana ikup gi se, wore am sokel ago ura towasan. Mu awuk, ana Kaem marak bagoso mu ko nangamang ningi nunguning aram. Nu kariimet suen biya nunga Saonga Kari. Se nu arikaya noko nongomang ningi nunguning mu nunga sangaru taukko. ^{▼▼1 Tim 4:10 Kaem mu Saonga Kari ningo: 1 Tim 2:3-4}

11 Se ni den imitang suen la Kris alo ninguru nunga kasuruko. 12 Kari bo ta ni kari kulak se me ka ari maguwurokko. ^{▼▼1 Tim 4:12 Bo me ka ari maguwurokko: Titus 2:15.} Mena. Ni saki alo nunga kua se, gemang ningi nunguning te baga se, ka munak te se ka bagara aolak te diram la bager, se Kris alo nika bagara mu aringimon ale turan te betemonko. 13 Se tom ni ani ago ko kimi bita se bager, mu ni Kaem ko den kariimet nomokete kau se, apu se, aguwaya betemonko mu nunga kasuruko. Ura mu ninguru bitarko. ^{▼▼1 Tim 4:13 Kaem ko den: 2 Tim 3:16-17.} 14 Ale ni munan sokel Kaem kisam, tom kari supuling alo nuguting ni sipiling te beteman ale Korang Bur te den ka manorman, umutang ura te bitarko, am ipi me anirukko. ^{▼▼1 Tim 4:14 Prophet den Timothy kumik te balman: 1 Tim 1:18; 2 Tim 1:6. Nuguting kariimet nusupuling te awura ko munan: Acts 6:6; 8:17; 9:17.}

15 Ura suen la ani ko ka manem, mu gemang ninguru tuiko. Se Kris alo suen la mu nika ura sokel gemawoso mu aringimonko. Keta ka bagara aolak ninguru ko sinar to ale, Kaem ko den diram la saki alo nunga manaruko. Pempem la uwutata bitar, umutang te ni keta nimi se, kariimet nika den ikiwasan mu buta marak yawara tom suen biya te bagaralko mu talko.

16